“EMAKUMEEN KONTAKIZUNAK” XIX. KONTAKIZUN-LEHIAKETA

Gaur egun indarrean dagoen Santurtziko Berdintasun Planaren helburuetako bat hizkuntza-adierazpena eta literatura-sorkuntza sustatu eta zabaltzea da, horrela jasota baitago aipatu plan horren konpromisoen atalean. Helburu horrekin eta Kontakizun Laburren Lehiaketaren aurreko edizioei jarraipena emanez, berorren XIX. edizioa deitu da.

Zenbait berrikuntza izan dira. Batetik, kategoria berri bat sortu da 13 eta 17 urte arteko neskentzat, eta horretarako irakaskuntza-zentroetan zenbait tailer egingo dira parte hartuko duten emakumeei kontakizuna idazten lagundu eta lehiaketan aurkezteko. Geletako azalpenez gain, aholkularitza-zerbitzua eskainiko da, non aditu batek aholkua eskatu duen parte hartzaile bakoitzaren kontakizunaren zirriborroa aztertuko duen. Aholkularitza doan izango da eta whastapp bidez egingo da 667 268 939 telefono-zenbakira deituta.

Bestalde, 18 urtetik gorako emakumeentzat sormenezko literatura-tailerra sortu da, kontakizun laburrei buruzko teknikak irakatsi eta aholkua emateko helburuz. Santurtziko edozein emakumek eman dezake izena Berdintasun Zerbitzura deituta; tailerra 18:00etatik 20:00etara egingo da astean behin eta azaroaren amaiera aldera bukatuko da. Gainera, edozein emakumek izango du aholkua doan eskatzeko aukera whatsapp bidez.

Santurtzin erroldatuta edo bertoko hezkuntza-zentroetan eskolaratutako emakumeak baino ezin izango dira aurkeztu, prestakuntza eta sarien onurak herriko emakumeek goza ditzaten.

Hona hemen sariak: 500na eta 200na euro kategoria bakoitzeko lehenengo eta bigarren sailkatuentzat hurrenez hurren. Lau kategoria egongo dira bi aldagaitan oinarrituta: hizkuntza (euskaraz edo gaztelaniaz) eta adina (13 eta 17 urte artean eta 18 urtetik gora).

Parte har ezazue!

Informazioa jasotzeko:

Berdintasun Zerbitzua

Murrieta etorbidea, 22, solairuartea 11. atea

Telefonoak> 94 483 35 66 eta 94 420 58 00 luz. 321

SANTURTZIKO ARETO FUTBOL TALDE EMAKUMEZKOA: LIGAKO TXAPELDUNAK!!

Santurtziko Emakumezko Areto Futbol taldea aurten hasi da talde gisa jolasten eta ederto atera zaie, euren kategorian lehenengo postua lortu dute eta.

Gainera, maiatzaren 26an Bigarren Mailara igotzeko partida jokatuko dute. Ekitaldia Mikel Trueba kiroldegian izango da 18:30ean. ETORRI ETA ANIMATU ITZAZU!!

Asier Navarro Olasagasti entrenatzailearekin hitz egin dugu eta hauxe esan digu:

Nola sortu zen ekimen hau?

Ideia klubean bertan sortu zen. Kontua zera da, kategoria guztietan taldeak ditugula eta eskola-kategorietan ere neska batzuk genituela, baina bagenekien ezin izango geniekeela ezer eskaini etorkizunean. Gainera, ikusten genuen herria nolabait horrelako talde bat eskatzen ari zela. Argi genuen emakumeen kirolari bultzada bat eman nahi geniola, eta gauza bat dela bestea dela proiektu eder honi ekitea erabaki genuen.

Nola lortu zenituzten jokalariak? Nola osatu zenuten taldea?

Jokalariak erakartzeko jardunaldi batzuk antolatu genituen eta sei lagun aurkeztu ziren. Gero kontua zabaldu egin zen eta argi geratu zen seriotan ari ginela eta nazio mailako entrenatzaile bat izango genuela proiektua gidatzen. Horrela, futbolean modu serioan aritu eta konpromisoa hartzeko prest zeuden neskek gure klubean egoera borobila topatuko zutela jakin zuten, eta poliki-poliki gainerako jokalariak joan ziren batzen. Ez dugu inor bazter utzi, etorri diren guztiak onartu ditugu.

Zer izan da zailena?

Zailena denak batera entrenatzea izan da, lan-ordutegiak eta bestelakoak uztartzea hain zuzen. Egia esan, kostatu zaigu taldea muntatzea. Baina behin lortuta, bestea berez etorri da. Neska hauekin lan egitea erraza da!!

Non eta noiz ikusi ahal zaituztegu partidetan? (egunak, ordutegiak…)

Liga amaitu da eta irabazi egin dugu, nahiko kontu argia izan da, bigarren postuan geratu direnei 14 puntuko aldea atera diegu eta. Mikel Trueba kiroldegian eta Kabiezesekoan jokatzen dugu, bietan. Maiatzaren 26an, larunbata, Bigarren Mailara igotzeko partida dugu. Santurtzin jokatuko da 18:30ean eta aukera paregabea izango da gu babestera etorri nahi duten guztiak etortzeko eta proiektuaren berri izateko.

Zein gomendio emango zenieke emakumezko areto futbolean izena eman nahi duten emakume gazteei?

Probatzeko esango nieke, giroa bikaina da eta kirola egiteko modu dibertigarria dudarik gabe.

Hona hemen jokalari batzuek esandakoa:

Ane: “Areto futbolean izena eman nahi duten emakume gazteei animatu eta kirol honetan hasteko esango nieke, eta jakina, Santurtzin dugun talde honekin bat egin dezatela, ezin hobeto hartuko ditugu eta. Estereotipoak apurtu behar dira!! Hasieran kirol hutsa dena zeureganatu egiten duzu guztiz, eta behin hasita ezinezko egiten zaizu uztea.”

Maitena (kapitaina): “Ausartzeko eta probatzeko esango nieke. Benetan areto-futbolean aritu nahi badute animatu daitezela, talde batean egotea ez delako jolas hutsa, askoz gehiago da: konpromisoa, adiskidetasuna, ikastea, diziplina, zure zaletasuna gozatzea eta batez ere, ikasteko eta ondo pasatzeko gogoa, izugarri gustatzen zaizun kirol baten bidez”.

Garazi: “Nik probatzera animatuko nituzke; oso kirol dibertigarria da eta gainera, klub honetan primeran tratatzen gaituzte”.

Ainhoa: “Nik denbora luze daramat areto-futbolean jolasten eta kasualitatez sartu nintzen arren, kirol honek berehala harrapatu ninduen, egia esan, ondo baino hobeto pasatzen dut jolasten”.

Usue: “Niri, neuri, primeran etorri zait, bai futbola eta bai areto-futbola, lagundu egin didalako pertsona gisa hazten eta neure burua prestatzen, oso-oso gomendagarria da”.

 ZORTE ON NESKAK!

EMAKUEAK DESBERDINAK GARA MIOKARDIO-INFARTUAREN AURREAN

Miokardio-infartua emakumeak hiltzeko lehen arrazoia da. Nahiz eta miokardio-infartu gehiago izan gizonen artean emakumeen artean baino, heriotza tasa handiagoa da emakumeen kasuan. Horren arrazoi bat honakoa da, emakumeok denbora gehiago ematen dugula laguntza eskatu arte, ez dakigulako zeintzuk diren emakumeon sintoma espezifikoak.

Bizkaiko Medikuen Elkargoak sustatutako Kanpaina honen helburuak honako hauek dira: emakumeek arrisku kardiobaskularrerako faktoreak zeintzuk diren hobeto jakitea, ohitura kardioosasungarriak hartzen dituzten emakumeen kopurua handitzea eta infartuaren sintoma atipikoak ezagutzera ematea, emakumeengan sarriago gertatzen baitira.

Ondoko mitoak agerian uztea dute helburu:

“Gaixotasun kardiobaskularra gizonen kontua da”

“Emakumeak hormonek babesten dituzte menopausia heldu arte”

Kanpainaren zabalkundea egiteko, sintoma tipikoak eta atipikoak azaltzen dituzten kartelak erabiliko dira. Izan ere, sintoma atipikoak emakumeengan sarriago gertatzen dira eta, askotan, infartua baino, antsietate arazoa dela pentsatzen dute emakumeek. Ondoko bideo honen modukoak ere izango dira eskuragarri: https://youtu.be/xgfoqyRoxCo