Admin-ren sarrera guztiak

GENERO-INDARKERIAREN KONTRAKO ERAKUSKETA IBILTARIA

Karmengo jaietan, genero-indarkeriaren kontrako erakusketa izan zen jai-jarduerak burutu ziren kale nagusietan. Erakusketa gaurtik aurrera Santurtziko osasun-zentroetan izango da, San Juan de Dios ospitaletik hasita, zeinen sarreran egongo den ikusgai.

Gaur goizean Marta Álvarez Gizarte Ekintza eta Berdintasun Arloko zinegotziarekin batera, OSI Ezkerraldea-Enkarterri-Gurutzeta Osakidetzako kideak izan dira prentsaurrekoan, besteak beste, Elena Uria Etxebarria (Asistentziako Programen Koordinazioa) eta José Luis Martín anaia (San Juan de Dios Ospitale-ordenaren ordezkaria).

Genero-indarkeriaren kontrako kanpainak hilabeteko iraupena izango du, zentro bakoitzean aste betez egongo delarik. San Juan de Dios ospitalean hasiko da eta udalerriko zentroetatik pasatuko da, hurrengo egutegian zehazten den modura:

 

Osasun-zentroa Data
San Juan de Dios ospitalea Azaroaren 6tik 10era
Buena Vista Azaroaren 13tik 17ra
Kabiezes Azaroaren 20tik 24ra
Mamariga Azaroaren 27tik abenduaren 1era

Marta Álvarezek adierazi duen modura, kanpaina bost irudiz dago osatuta. Irudiok jazarpen matxista eta horren osteko biktimaren eta ingurukoen erreakzioa erakusten dute, Santurtziko jaietan abian jarri genuen kontzientziazio bidearekin jarraitzeko.

Osasun-zentroek berebiziko garrantzia dute genero-indarkeria prebenitzeko, sentsibilizazioa burutzeko eta kasuak hautemateko; horregatik, “Udalaren eta bereziki Gizarte Ekintza eta Berdintasun Arloaren eta herritarren osasun integralarekin lotutako baliabide eta zerbitzuen arteko lankidetzaren barruan dago kanpaina”. Bereziki, lankidetza soziosanitario horren lehentasunezko helburuetako bat genero-indarkeria prebenitzea da.

Prebentziorako ekintzen arteko eraginkorrenetako bat sexismoa eta indarkeria matxista adierazten duten egoerak identifikatzea eta agerian jartzea da, kanpainaren paneletan ikusten den bezala. “Gizon eta emakumeen arteko berdintasunezko harremanei buruz hausnartzeko helburua dago, bai eta genero-indarkeria egoera baten aurrean jarduteko konpromiso pertsonala agerian jartzekoa ere” gaineratu du Álvarezek.

Kanpainak “indarkeriaren kontrako borrakaren gaur egungo helburuak azpimarratzen ditu, hots, guztiok aldaketarako erronkak hartu behar ditugula, gizon eta emakumeen arteko berdintasun oso eta eraginkorra lortze aldera gizarteko maila guztietan”.

San Juan de Dios Ospitale-ordenaren ordezkaria eta Santurtziko San Juan de Dios ospitaleko Anaia nagusia den José Luis Martín anaiak, berriz, irabazi asmorik gabeko ospitale-talde horren “emakumeenganako indarkeriaren kontrako” konpromisoa berretsi zuen gertaratutakoen aurrean. Adierazi zuenez, “pertsonaren duintasun, lagun hurkoarekiko errespetu eta gizarteko harremanetako erantzukizun balioak geure-geureak dira eta geure egiten ditugu; hortik gure konpromisoa. Santurtzi eta ezkerraldeko arlo soziosanitarioko eragileak eta erakunde publikoen (Udala eta Osakidetza) kolaboratzaile fidelak garen neurrian, esker ona eta inplikazioa agertu nahi dugu hilero emakume askoren heriotza eragiten duen sentsibilizazio eta prebentzio ekimen honetan”.

Halaber, Santurtziko San Juan de Dios ospitaleko plantillaren % 80 baino gehiago emakumeak direla eta Maika Palacios Euskal Herriko osasun pribatuko emakumezko zuzendari-gerente bakarra osasun-zentroan dagoela jakinarazi digu. “Ziur gaude hemendik, gure izaera ospitalarioarekin, asko eman dezakegula indarkeria horren sentsibilizazio, prebentzio eta identifikazioan eta erabateko berdintasunaren alde”, esanez bukatu zuen José Luis Martín anaiak.

GIZONEN BIRIBILA

 

Urriaren 20an Berdintasunaren aldeko gizonen Elkarretaratzea izan zen eta udal langile, elkarteetako kide eta herritarrak bildu ziren.

Itsasoko Ama eskolako zuzendaria den José Antonio Expósitok irakurri zuen AHIGEk idatzitako adierazpena, eskolek eta familiek gizartearen izurriaren kontra egiten duten lana agerian jarriz.

Jarraian, San José de Calasanz ikastetxeko Gizarteratzeko 2. mailako ikasle batek irakurri zuen ikasleen artean idatzitako testu interesgarri eta hunkigarria. Hona hemen testua:

Alicia, Ada, Jenny, María, Almudena, Nagore, Mari Luz, Amelia, Melissa, Annie, Leire, Alexxe, Andina, Amagoia, Maureen, María Angeles, Montserrat, Blanca, Mélodie, Noelia, Ana…

ZENBAT GEHIAGO???

ZENBAT IZEN GEHIAGO KONTATU BEHARKO DITUGU?????

ZENBAT ERAILKETA GEHIAGO?????

Neska-mutilok:

Gaur, Santurtziko San José de Calasanz ikastetxekook matxismoaren eta emakumeen kontrako indarkeriaren aurrean gaitzespenik irmoena agertu nahi dugu.

Neskek eta emakumeek etengabeko indarkeria pairatzen dute gizonengandik, emakumezkoak izateagatik. Prostituzioa eta emakumeen trafikoa, emakumea gauza bihurtuz eta bere gorputza salgaia balitz bezala erabiliz; eta emakumeen erailketak, eta beren seme-alabena, indarkeria matxistaren izozmendiaren tontorra baino ez da. Ez da gertatzen den gauza bakarra.

Indarkeria matxista, sexismoa eta erasoak ez dira modu isolatuan azaltzen. Bizi garen gizarteak berak sustatu eta ahalbidetzen du indarkeria. Gizartea, patriarkala denez, mikromatxismoz beteta dago, ikusezin ematen duten arren egunero etxean, klasean, kuadrillan, hedabideetan, gure harremanetan… gertatzen diren biolentziez beteta.

Dugun maitasun erromantikoaren kontzeptuan, jelosia eta kontrola maitasun eta kezkaren sinonimoak dira. Ideia faltsu horiek indarkeria sortarazten dute eta ez dute errespetuan eta babesean oinarritutako harreman osasuntsurik sortzen.

Horregatik, gaur argi eta garbi utzi nahi dugu emakumeen kontrako indarkeriaren aurka borrokatzea eta indarkeria hori desagerraraztea beharrezkoa dela. Txantxa “hutsa” bezalako imintzio txikienetik, indarkeria fisiko, psikologiko, sexual edo ekonomiko mota guztietara. Piropoak, jazarpena, tratu txarra, sexu erasoak, bortxaketak, erailketak ez gertatzea beharrezkoa da.

Gizartearen eraldaketa ezinbestekoa dela uste dugu, guztiok inplikatu eta ardura hartzeko. Babes ditzagun borroka feminista eta gure inguruko emakumeak ahalduntzeko prozesuak. Eta jakina, egin dezagun guk, gizonok. Ezin dugu isilik jarraitu honek ez duela gurekin zerikusirik adieraziz. Isiltasunak konplize bilakatzen gaitu. Lan handia dugu egiteke eta diskurtsotik praktikara pasatzeko unea da.

Egunez egun gure erantzunak irmoa izan behar du.

Goratu dezagun ahotsa eta esan dezagun argi eta garbi: EMAKUMEEN KONTRAKO INDARKERIA ARBUIATZEN DUGU

Birplantea ditzagun ditugun pribilegioak eta pentsamoldeak, jarrerak eta jokaera matxistak.

Susta ditzagun errespetuan, berdintasunean eta askatasunean oinarritutako jokaerak.

Eta, inguruan ditugun mutil eta gizonei egin diezaiegun honako eskari hau:

Ez begiratu beste alde batera, ez babestu erasotzailerik, ez onartu inguruan inolako indarkeria egoerarik, emakumeen kontra EZ ERABILI indarkeriarik, desberdinkeriarik edo bazterkeriarik. Ezerk ez du justifikatzen.

ALDA GAITEZEN PERTSONA GUZTIAK ASKE DIREN MUNDUA LORTZEKO.

ERAIKI DEZAGUN BERDINTASUNEAN OINARRITUTAKO GIZARTEA

GIZONEN BIRIBILA. BERDINTASUNAREN ALDE ETA INDARKERIA MATXISTAREN AURKA

Berriz ere gonbidatu nahi zaituztegu ostiralean, urriaren 20an, eguerdiko 12:00etan, Udaletxearen aurrean izango den Berdintasunaren aldeko eta Indarkeria Matxistaren kontrako Gizonen Elkarretaratzera.

Guzti guztioi eskatzen dizuegu elkarretaratzera etortzeko, gizartearen izurri hori arbuiatzera eta emakumeen kontrako indarkeria mota guztietako biktimen alde egitera. Adierazpena irakurri eta minutu bateko isilaldia egingo da.